Parlament Senaty Áleýmettik-mádenı damý jáne ǵylym komıtetiniń keńeıtilgen otyrysynda «Kınematografııa týraly» zań jobasy qaraldy.
Zań jobasy kınematografııa salasyndaǵy quqyqtyq, ekonomıkalyq jáne uıymdastyrýshylyq negizderdi aıqyndaý maqsatynda ázirlendi. Kınematografııa salasyndaǵy qoǵamdyq qatynastardy retteıtin derbes zańdy qabyldaý kınoóndiristi qoldaý, ulttyq fılmderdiń sapasy men básekege qabilettiligin arttyrý, halyqqa arnalǵan kıno kórsetý qyzmetiniń qoljetimdiligi, kınoındýstrııanyń ashyqtyǵy men ınvestısııalardyń tartymdylyǵy, qazaqstandyq kınonyń sheteldegi bedeliniń ósýi men tanylýy úshin zańnamalyq deńgeıde jaǵdaı jasaý qajettiligimen negizdelgen.
Zań jobasymen jalǵyz quryltaıshysy jáne aksıoneri Qazaqstan Respýblıkasynyń Úkimeti bolyp tabylatyn Ulttyq kınony qoldaý memlekettik ortalyǵynyń (budan ári − Ortalyq) jumys isteýi úshin quqyqtyq negiz jasalǵan. Ulttyq kınony qoldaý memlekettik ortalyǵy ulttyq fılmder dep tanylýǵa úmitti kınojobalardy jáne ulttyq fılmderdi memlekettik qarjylyq qoldaýdy usyný, sondaı-aq kınematografııa salasyndaǵy sýbsıdııalardy tóleý jóninde biryńǵaı operator bolyp tabylady.
Fılmdi ulttyq dep taný jónindegi usynystardy tujyrymdaý maqsatynda Ortalyqtyń janynan Saraptama keńesi – shyǵarmashyl qyzmetkerler men sarapshylar qatarynan konsýltatıvtik-keńesshi organ qurylady. Zań jobasymen sondaı-aq ulttyq kınony memlekettik qarjylandyrýdyń jańa úlgisin engizý usynylady. Memlekettik qarjylyq qoldaý ulttyq fılmderdi shyǵarýdy, prokattaý men kórsetýdi jáne osyǵan baılanysty is-sharalardy uıymdastyrý, sondaı-aq ulttyq fılmderdi shetelde ilgeriletý úshin usynylady.
Ulttyq fılmderdi memlekettik qarjylyq qoldaý máseleleri boıynsha usynystar men usynymdardy tujyrymdap daıyndaý maqsatynda Qazaqstan Respýblıkasy Úkimetiniń janynan konsýltatıvtik-keńesshi organ – Ulttyq fılmderdi memlekettik qarjylyq qoldaý máseleleri jónindegi mekemearalyq komıssııa qurylady. Zań jobasy qabyldanǵan soń Fılmder monıtorınginiń biryńǵaı avtomattandyrylǵan aqparattyq júıesi qurylatyn bolady, ol Qazaqstan Respýblıkasynyń aýmaǵynda fılmderdi júıege keltirý jáne esepke alýdy qamtamasyz etedi. Sondaı-aq zań jobasymen ulttyq mádenı ıgiliktiń ajyramas bóligi retinde ulttyq fılmderdi jáne jekelegen zańdy tulǵanyń jumys isteýi arqyly bastapqy materıaldardy saqtaý jolymen ulttyq kınematografııany qoldaý kózdelip otyr.
Zań jobasyna sáıkes fılmdi festıvaldarda, semınarlarda, retrospektıvada kórsetý jaǵdaılaryn qospaǵanda, Qazaqstan Respýblıkasynyń aýmaǵynda fılmdi prokattaý jáne kórsetý ol Memlekettik fılmder tiziliminde tirkelgen kezde ǵana jáne berilgen prokattaý kýáligine sáıkes júzege asyrylady. Sonymen qatar, Qazaqstan Respýblıkasynda shyǵarylǵan barlyq fılmderge jáne Qazaqstan Respýblıkasynyń aýmaǵynda prokattaý maqsatynda ákelinetin (jetkizilgen) fılmderge jas sanattary berile otyryp, jasqa synyptaý júzege asyrylady. Qazaqstan Respýblıkasynyń aýmaǵynda fılmderdi prokattaý qazaq tilinde jáne basqa da tilderde júzege asyrylady. Ulttyq fılmderdi prokattaý qazaq tilinde jáne qajettiligine qaraı basqa da tilderde júzege asyrylýǵa tıis.
Prokattalýy shekteýli fılmderdi qospaǵanda, Qazaqstan Respýblıkasynyń aýmaǵynda kınozaldar men osy maqsattarǵa arnalǵan ózge de oryndarda prokattalatyn jáne kórsetilýi qazaq tilinde júzege asyrylmaıtyn fılmder qazaq tiline dýblıaj jasalýǵa ne sýbtıtrlenýge, ne kadr syrtyndaǵy aýdarmamen qamtamasyz etilýge tıis. Komıtet otyrysynda sondaı-aq «Qazaqstan Respýblıkasynyń keıbir zańnamalyq aktilerine kınematografııa máseleleri boıynsha ózgerister men tolyqtyrýlar engizý týraly» zań jobasy qaraldy. Negizgi zań jobasynyń tujyrymdamalyq baǵyttaryn eskere otyryp, Qazaqstan Respýblıkasynyń Ákimshilik quqyq buzýshylyq týraly kodeksine, «Salyq jáne bıýdjetke tólenetin basqa da mindetti tólemder týraly» Qazaqstan Respýblıkasynyń Kodeksine jáne «Mádenıet týraly» Qazaqstan Respýblıkasynyń Zańyna ózgerister men tolyqtyrýlar engizý usynylady.
Atalǵan túzetýler salalyq sıpatqa ıe jáne kınematografııamen baılanysty máselelerdi quqyqtyq retteýge arnalǵan. Qazaqstan Respýblıkasynyń Ákimshilik quqyq buzýshylyq týraly kodeksine engiziletin túzetýler Qazaqstan Respýblıkasynyń mádenıet týraly zańnamasynyń talaptaryn buzǵany úshin tıisti jaýaptylyqty kózdeıdi. «Salyq jáne bıýdjetke tólenetin basqa da mindetti tólemder týraly» Qazaqstan Respýblıkasynyń Kodeksine engiziletin ózgerister men tolyqtyrýlar ulttyq fılmderdi óndirý jáne prokattaý úshin salyqtyq preferensııalardy qoldanýdy kózdeıdi.
Atalǵan túzetýlerge saı Qazaqstan Respýblıkasynyń kınematografııa týraly zańnamasyna sáıkes ulttyq fılm dep tanylǵan fılmdi Qazaqstan Respýblıkasynyń aýmaǵyndaǵy kınozaldarda kórsetýden túsetin kirister boıynsha korporatıvtik tabys salyǵy 100 paıyzǵa azaıtylýǵa jatady. Zań jobasymen «Mádenıet týraly» Qazaqstan Respýblıkasynyń Zańyna qaıtalanatyn normalardy alyp tastaý jáne «Kınematografııa týraly» Qazaqstan Respýblıkasy Zańynyń jobasyna sáıkes keltirý bóliginde ózgerister men tolyqtyrýlar engiziledi.
Atalǵan túzetýlerge sáıkes mádenıet salasyndaǵy memlekettik saıasatty jetildirý maqsatynda ýákiletti organ konsýltatıvtik-keńesshi organdardy – teatr, mýzyka qyzmeti jáne konserttik qyzmet, sırk óneri, mýzeı isi jáne arheologııa, beıneleý óneri, sáýlet jáne dızaın, ádebıet jáne kitap basyp shyǵarý jónindegi salalyq kórkemdik keńesterdi qurady. Osy zań jobasy qabyldanǵan jaǵdaıda Qazaqstan Respýblıkasynda kınematografııany damytý úshin qajetti jaǵdaılar jasalady.
Qujattar Palatanyń qaraýyna jiberildi.